شيخ محضر يا شيخ محضر

شيخ محضر يا شيخ محضر...
أنا فايق ولا مخدر!!...
من بعد ما بخرنا البيت...
وطردنا كل العفاريت...
اتفتحت تاني الحواديت...
والعفاريت رجعت تظهر...
شيخ محضر يا شيخ محضر...
بخرنا بأغلى ما فينا...
عيشنا وراحة أهالينا...
العفاريت طلعوا علينا...
أكلوا اليابس والأخضر...
شيخ محضر يا شيخ محضر...
بعد ما صحينا الملايين...
بعد الفرحة لكل حزين...
فجأة بقينا إحنا الشياطين...
والعفاريت جاية تبخر!!...
شيخ محضر يا شيخ محضر...
والعفاريت أنواع أنواع...
دا معاه فلوس ودا عنده دراع...
ودا كل كلامه بيتذاع...
ودا متباع ودا متأجر...
شيخ محضر يا شيخ محضر...
دا العفريت الإعلامي...
أنعم من قطة سيامي...
خلى وراي قدامي...
وأنا باتلفت وأتحير...
شيخ محضر يا شيخ محضر...
ودا عفريت جرنالجي حويط...
تمشي القصة يهيص ويزيط...
قلبت. يعمل فيها عبيط...
ويقول لك كنت باهزر!!...
شيخ محضر يا شيخ محضر...
ودا عفريت شخشوخ بيلُك...
شغلانته على عقولنا يسك...
ملك الجان يغلط ويعك...
والشيخ يشرح ويبرر!!...
شيخ محضر يا شيخ محضر...
شيخ قبلته هي السلطة...
أنفاسه فيها مغالطة...
وكلامه يجيب لك جلطة...
إن خش الودن يعور...
شيخ محضر يا شيخ محضر...
ودا عفريت راجل أعمال...
تاجر حتى في راحة البال...
عنده إجابة لكل سؤال...
ووعود تتول وتخدر...
شيخ محضر يا شيخ محضر...
ودي عفريتة ومكنة رقص...
جاية تكمل لينا النقص...
بترطب وبتعمل طقس...
ساعة ما الجو يحرر...
شيخ محضر يا شيخ محضر...
آه. رقاصة بكرت بلنش...
إيه شهاداتها؟ صدر وهنش...
والحضن إلي أوسع م المنش...
ودا كله لإلي يقدر...
شيخ محضر يا شيخ محضر...
زغروطة يا أهل التدليس...
ما اتعجنت بإدين إبليس...
بكرة نشوف مسلم قسيس...
ومسيحي خريج الأزهر!!!...
شيخ محضر يا شيخ محضر...
اتعجنت صح يا ويكة...
والبركة في العَكِّيكة...
حطوا المش على الكيكة...
والمستردة على الكستر!!...
شيخ محضر يا شيخ محضر...
آه يا بلدنا يا مسكينة...
كام ماسكين لك سكينة...
وإلي ندهناه يوعينا...
لازق على وعيه بلستر!!...
شيخ محضر يا شيخ محضر...
العفاريت رقصوا عرايا...
قدام عيني ووراي...
بإديهم حرقوا الراية...
وإحنا نبص ونتحسر...
شيخ محضر يا شيخ محضر...
خلوا الجنة بقت مراحيض...
م المُحن إلي يزيد ويفيض...
عاملين لينا مربة بيض...
بعدها تنعس وتشخر...
شيخ محضر يا شيخ محضر...
وأنت يا ثوري موت م الغل...
بل الكون بدموعك بل...
عارف ذنبك إيه يا جِبِلّ؟...
إنك حر وبتفكر...
شيخ محضر يا شيخ محضر...
والعاشق مات من غمه...
مش حاجة تفور دمه...
إن العفاريت يتلموا...
وإحنا يا مصر بنتبعتر!!...
ارميهم من أحضانك...
العفاريت مش سكانك...
بيقيدوا النار في غيطانك...
وبيستنوا زرع أخضر!!...
اخلصي م العفاريت السَو...
عمر الحنضل ما هايحلَو...
طعمه هايفضل مر ولو...
غرقنا الحنضل سكر...
ليه دايما رافضة حناني؟...
والدمع إلي في أجفاني؟...
هو أنا جيت قبل أواني؟...
ولا أنا جيت لك متأخر!!...
وأنا بدمي حنيتك...
ورقيتك واسترقيتك...
م الشياطين إلي في بيتك...
ودعيت الفجر ينور...